Վերելք

Վիքիդարանից՝ ազատ գրադարանից
Վերելք

հեղինակ՝ Հովհաննես Շիրազ


Աչքերիս մէջ գարնան օրեր,
Ճամբէս` բաղդիս սարերն ի վեր`
Ելնում եմ ես քարերն ի վեր,
Ելնում եմ ես սարերն ի վեր`
Քարե՜ր, սարե՜ր, դարե՜րն ի վեր:

Բաղդս աստղերն են վեր պահել,
Ջահել եմ ես ու ձիս ջահել,
Չեմ նկատում քարեր ճամբիս,
Չեմ նկատում սարեր ճամբիս,
Քարե՜ր, սարե՜ր, դարե՜ր ճամփիս:

Շանթն է բեկւում ճակտիս վրայ,
Մահ չգիտեմ` կայ թէ չկայ,
Ելնում եմ ես ահերն ի վեր,
Ելնում եմ ես մահերն ի վեր,
Ահե՜ր, մահե՜ր, գահե՜րն ի վեր:

Աչքերիս մէջ գարնան օրեր,
Ճամբէս դէպի աստղերն անմեռ,
Ինձ ելնելու քարեր կան դեռ,
Ինձ ելնելու սարեր կան դեռ,
Քարե՜ր, սարե՜ր, դարե՜ր կան դեռ: