Աղբյուր (Ջիվանի)

Աղբյուր

Իզուր ես ջուրըդ սպառում
Խաղաղվիր, աղբյուր, խաղաղվիր,
Դու քեզ վնաս ես պատճառում,
Խաղաղվիր, աղբյուր, խաղաղվիր։
Երբ պիտի կշտանաս, հագիս,
Որ գժության չփափագիս,
Զգույշ եղիր, կցամաքիս,
Խաղաղվիր, աղբյուր, խաղաղվիր։
Կյանքդ նիհար, բարակ մազ է,
Կչորանաս, հանդարդ վազե,
Ի բնե ջուրըդ նվազ է,
Խաղաղվիր, աղբյուր, խաղաղվիր։
Չափազանց պարզ ու վճիտ ես,
Խորագետ չես, միամիտ ես,
Չարդ ու բարիդ դեռ չգիտես,
Խաղաղվիր, աղբյուր, խաղաղվիր:
Շուրջդ կերպ-կերպ աղբյուրներ կան,
Աղի, լեղի, անդուրեկան,
Մի մոտենա, վնաս կուտան,
Խաղաղվիր, աղբյուր, խաղաղվիր։

Օգտավետ ջուր ես, իստակ ես,
Սեղմված ես, ճնշման տակ ես,
Անկարեկից փոքրիկ ակ ես,
Խաղաղվիր, աղբյուր, խաղաղվիր։

1905

---