Այսօր (1904) (Ջիվանի)
Այսօր
Իմ սրտիս ու հոգուս նվագարանի
Լարերը ներդաշնակ չեն խոսում այսօր,
Հոգեկան թելերս հնչուն, պիտանի,
Ժանգոտել են, իստակ չեն խոսում այսօր։
Կոպիտ ձեռք է դիպել սրտիս քնարին,
Սարքելը դարձել է ինձ անհնարին,
Ձայնը խռպոտել է ամեն մի լարին,
Չի հանում աղաղակ, չի խոսում այսօր։
Ջիվանի հոգսերը մեծ ցավ են դարձել,
Կպել են իմ անձիս, հալավ են դարձել,
Քաղցրաձայն լարերս ագռավ են դարձել,
Որպես ճարտար սոխակ չեն խոսում այսօր։
1904