Աստուածածին, ամպ լուսաւոր
Աստուածածին, ամպ լուսաւոր, որ զցօղն կենաց հեղեր յերկիր բանաւոր. եւ զնախամօրն շիջուցեր պարտեացն զհուր. անդադար ձայնիւ զքեզ բարեբանեմք. եւ հոգեւոր երգով մեծացուցանեմք:
Տեղի անտանելի Բանին. եւ երկիր վայրափակ յորում լոյսն ագանիցի. եւ արեւելք արեգական արդարութեան. անդադար ձայնիւ զքեզ բարեբանեմք. եւ հոգեւոր երգով մեծացուցանեմք: Զքեզ կատարումն մարգարէից. կուսական քո ծննդեամբ, որով բնութեանս քակտեցան օրէնք. հրաբուն սեռիցն փոխադրեալ ի լուսաճեմ խորանսն. անդադար ձայնիւ զքեզ բարեբանեմք. եւ հոգեւոր երգով մեծացուցանեմք: