Գեաֆ (Ջիվանի)

Գեաֆ

Լսիր, սիրելի, իմ աղաչանքս՝
Արժան համարե լուր պաղատանքս.
Կեղծ մի համարեր իմ գովասանքս,
Սրտով սիրում եմ քեզ, բարի կյանքս:

Աստված վկա է, քեզ սիրում եմ շատ
Եղիր միամիտ, ընծայե հավատ,
Լինիս երանի սուրբ ու անարատ,
Սա է հարաժամ ցանկալի ջանքս։

Ամեն առավոտ խնդրում եմ այսքան,
Սրտիդ համեմատ տերը տա արժան,
Առաձց քեզի ես եմ կիսակենդան,
Շատ է նազելի, միշտ գորովանքս:

Ափսոս, գեղեցիկ, չես նայում ինձի,
Տեսույդ նայիլը խնայում ինձի,
Իզուր մի մաշեր ներկայում ինձի,
Արդեն կա վաղուց իմ տոչորանքս:

Եղիր Ջիվանուս հաստատուն ընկեր,
Խավար մտացս լուսատու լապտեր,
Սպասելով՝ ինձ չմնաց համբեր,
Սաստիկ ավելացավ իմ մոլորանքս:

---