«Մշակն» էլ մինչև այս ամսի վերջը ասում են, իբրև հաստատ բան, կհրատարակվի3:
Իմ գրքերից ուզել էիր. Ա-ից 15 օրինակ, Բ.-ից, որքան լինի։ Ուղարկում եմ 15 օրինակ Ա-ից, 10 օրինակ Բ-ից4. տոկոսով տուր ձեր գրաշրջիկին։ Լսեցի, որ հիվանդ ես եղել, գրիր՝ ինչու էիր հիվանդացել և ինչ եղար։
Ընդունիր իմ և մեր ամբողջ գերդաստանի սրտագին ողջույնը, որ սպասում են օրհնությանդ։
Ինձանից բարևիր Տիգրան սարկավագին, ա՛խ, բոլորովին մոռացել եմ, կարծեմ նա էլ ձեռնադրվեց, չէ՞։ Գրիր, ի սեր աստծո, վերջապես, երկու Տիգրան սարկ<ավագ> են, ես շփոթում եմ։ Բարևիր պ. պ. Եզեկյանին, Մանվելյանին, Լևոն աբեղային (գրքերի մեջ մեկն ուղարկում եմ նրան):
Արդեն հասել ենք Հաղպատ, երկու քննություն վերջացրել (չնչին և պարապ բաներ են) և այսօր մի ժամից հետո ճանապարհ ենք ընկնում դեպի Սանահին1։ Շատ լավ ենք ճանապարհորդում, միայն ես քիչ մրսեցի, խինա խմեցի, անցավ։ Մի քանի օրից հետո մեր գյուղում կլինենք։ Քեզ և երեխաներին գրեթե ամեն գիշեր երազում տեսել եմ, բայց երբեմն շատ անհանգստացնող երազներ եմ տեսնում։ Գուցե մինչև ամսի վերջն այդտեղ լինենք։ Չմոռանաս երեխաներին շուտ-շուտ ման ածելու տանել և ամեն տեսակ մրգեր չուտացնես։ Երեկ Արճիսից գալիս տերտերի ձին չոքեց հանկարծ. տերտերը բոլորովին անվնաս վայր ընկավ խուրձերի վերա։
