Էջ:Armenian classical poetry vol 1.djvu/59

Ընդ առաւօտս լուիցես
Ձայնի իմում, տէ՛ր,
Թագաւոր իմ և աստուա՛ծ իմ։

Ես զքե՛զ կաղաչեմ, տէ՛ր,
Նայեաց յաղօթս իմ,
Թագաւոր իմ և աստուա՛ծ իմ։

***

Ծով կենցաղոյս հանապազ զիս ալեկոծէ,
Մրրկեալ ալիք թշնամին ինձ յարուցանէ.
Նաւապե՛տ բարի, լեր անձին իմոյ ապաւէն։
Ի համբառնալ իմում առ քեզ զաչս իմ՝ օգնեա՛ ինձ, տէր։
Ի յօրհնութիւն նոր օրհնեսցուք զքեզ, Քրիստոս փրկիչ մեր։
Այցելու մեր և փրկիչ, կեցո՛ զանձինըս մեր։

***

Մեղք իմ բազում են յոյժ,
Ծանր են քան զաւազ ծովու,
Քանզի քեզ միայնոյ մեղայ,
Ողորմեա՛ ինձ, աստուած։

Բաց, տէ՛ր, զդուռն ողորմութեան,
Որ ողբալով կարդամ առ քեզ,
Քանզի քեզ միայնոյ մեղայ,
Ողորմեա՛ ինձ, աստուած։

Հեղ յիս զգթութիւնդ քո,
Բազումողորմ և մարդասէր.
Քանզի քեզ միայնոյ մեղայ,
Ողորմեա՛ ինձ, աստուած։

***

Աստուած բազումողորմ,
Խնայեա յարարածս քո,
Հայր ամենակալ, և ողորմեա՛։