Մայիսի 14. Երևանից Դզնունին՝ Բեկնազարովին. «Քալանթարը համաձայն է։ Բակունցն ուշացավ կուստոմսն ստանալու պատճառով։ Մեկնում է 15—ին։ Դրամի մի մասը ուղարկեցինք այսօր» (թերթ 8)։
Իրականում, Ա. Բակունցի ուշանալու պատճառը որդու ծանր, երկարատև հիվանդությունն էր (անգինայից արյան վարակում)[1]։ Հավանաբար Մոսկվա է մեկնել մայիսի 15—ին կամ գուցե մի քանի որ հետո։
Հունիսի 4. Մոսկվայից Բաբլոյանը[2] հեռագրում է Երևան Դզնունուն, դրամ խնդրելով՝ Բակունցի, իր և Գարոշի (նկարահանող—օպերատոր Գ. Բեկնազարյան), ինչպես և Բուրսուկայի հյուրանոցային ծախսերի համար (թերթ 31)։
Հունիսի 19. Երևանից Բաբլոյանը՝ Մոսկվա Բեկնազարովին. «Տասնյոթին հեռագրով ուղարկված է՝ Ձեզ երկու հազար, Բակունցին՝ հազար, Հայկազյանին՝ յոթ հարյուր:
Հունիսի 26. Մոսկվայից Բուրսուկան և Բակունցը՝ Դզնունուն. «Մեր հասցեով ե՞րբ եք դրամ ուղարկել»։
Հունիսի 27. Մոսկվայից Բեկնազարովը՝ Երևան Դզնունուն. «Բեմադրի երկրորդ տարբերակը Բակունցը չի ներկայացրել: Նույնիսկ եթե ներկայացված նյութը պետքական էլ լինի, խորհրդատուների հետ աշխատելու անհրաժեշտություն կզգացվի առնվազն երկու ամիս: Նկարահանումը կսկսենք ուշացումով։ Բնականից նկարահանելը չենք հասցնի։ Նկարը հոբելյանին չենք հանձնի: Այս մասին տեղեկացրեք ղեկավար մարմիններին» (թերթ 21):
Հունիսի 28. Երևանից Դզնունին՝ Մոսկվա Բեկնազարովին. «Ամեն պարագայի նկարը պետք է հանձնեք հոբելյանին։ Բակունցը Ձեզ հետ միասին խորհրդառություններից հետո պետք է կարողանա բեմագիրը հաստատել տալ այն հաշվով, որպեսզի նախապատրաստական շրջանն սկսեք ոչ ուշ, քան օգոստոսի 15—ին» (թերթ 23):
Հուլիսի 4. Մ ոսկվա Բեկնազարովին. «Յոթին հեռագրով կուղարկենք 4000, Բակունցին՝ 3000:
Հուլիսի 17. Երևանից Դզնունին՝ Մոսկվա Բեկնազարովին. «Անմիջապես ուղարկեցեք «Զանգեզուրի» վերջին տարբերակը» (թերթ 20)։
Այս, ինչպես և հունիսի 27—ի հեռագրերից, ըստ երևույթին, պետք է եզրակացնել, որ Մոսկվայում խորհրդակցելով կինոմասնագետների հետ և աշխատելով բեմագրի վրա՝ Բակունցը ստեղծել է «Զանգեզուրի» մի նոր տարբերակ։ Ո՞րն է այդ: Արդյոք վերը մեր հիշած «Համառոտ լիբրե՞տտոն», թե մի ուրիշը, որ մեզ չի հասել։ Բայց և հաջորդ հեռագրից պարզվում է, որ Բակունցը դեռևս բեմագրի վրա աշխատելը չի ավարտել։
Հուլիսի 19. Մոսկվայից Բեկնազարովը՝ Երևան. «Շկլովսկին, Լեոնիդովը հրաժարվեցին խորհրդական լինելուց՝ դրամ չստանալու պատճառով... Բակունցը մնացել է առանց դրամի, աշխատանքը չավարտած ուզում է վերադառնալ: Դրամական անընդհատ