հարսանիքի խնդությունը ավելի կատարյալ լինի։ Հավաքվեցան բոլոր քաջքերը, նույնիսկ փեսացուն ու հարսնացուն էր:—
Արա՜,— ասացին,— ի՞նչ օյին պիտի ցույց տաս։
Թաթուխն ասաց.— ձեռքներդ դրեք այս ճեղքումը, ես հետո ցույց կտամ։
Ամենքն էլ շտապելով ձեռքները դրին գերանի ճեղքումը, որ շուտով տեսնեն օյինը:
Թաթուխն իսկույն սեպերը հանեց, և բոլոր քաջքերը միաբերան սկսեցին աղիողորմ ոռնալ։
— Վա՜յ, վա՜յ, կոտորվեցինք, այս ի՞նչ արավ այս մարդը. մի՞թե այսպես օյին կլինի։
Թաթուխն ասաց.— Այդ դեռ առաջաբանն է, օյինը հետո պետք է լինի։— Ասացեք, դո՞ւք եք հանել իմ հորն ու մոր աչքերը և որտե՞ղ եք պահել... Մինչև նրանց աչքերը չտաք, ձեզ փրկություն չկա։
— Այո՛, այո՛, վա՜յ, վա՜յ,— ասաց մեկը, որի սիրտը ամենից շատ էր կսկծում ցավից...— Ահա այնտեղ է, այնտեղ, այն թփի տակին, գնա՛ վերցուր և ազատիր մեզ։
Թաթուխը գնաց վերցրեց աչքերը և եկավ հարցրեց.
— Աչքերը գտա, բայց ինչպե՞ս պետք է սաղացնեմ։
— Աչքերը կդնես իրանց տեղը և մեր նորահարսի աղլուխովը կշփես, իսկույն կառողջանան։
Թաթուխը գնաց վերցրեց նորահարսի աղլուխը։
— Դե, հիմա ազատիր մեզ,— աղաղակեցին ամենքը։
— Կազատեի, բայց ո՞վ է երաշխավոր, որ դուք ձեր վրեժը չեք լուծիլ և մեծ պատառս ականջս չեք թողնիր: Չէ՛,այդ հույսը մի՛ ունենաք ինձանից, ձեզ փրկություն չկա, լացեք ձեր սև օրը:
Դևերի հարսանիքը սուզի փոխվեցավ։ Աղաչանք, պաղատանք չազդեցին նրա վրա, ու ի՞նչ խելք կլիներ, եթե փըրկեր: Կացինը ձեռն առավ մեր Թաթուխը և մեծից սկսած մինչև փոքրի գլուխները ջախջախեց, և այն սարը սրբեց գարանագործ դևերից։