խռովուեցայ», բայց ես վիպասան չեմ ու պարտական եմ ըսել միմիայն ճշմարտութիւնը, և իրականութիւնը այն է, որ կատարեալ անտարբերութեամբ ընդունեցի այդ յայտնութիւնը և նոյն իսկ այդ պահուն անունդ չի հարցուցի։
Բայց անՀրաժեշտ է նախապէս ներկայացնել քեզ իմ կեանքիս պայմանները, այն բարոյական մթնոլորտը, ուր կապրէի, ամուսնոյս հանդէպ իմ դիրքս, և այն վիճակը, որ կը տիրէր մեր մէջ։ Շատ երիտասարդ ամուսնացած եմ, և ահա թէ ինչպէս։ Միքայէլ զիս կնութեան ուզած էր մեր ամուսնութենէն հինգ տարի առաջ, երբ տակաւին տասնութը տարեկան դեռատի օրիորդ մըն էի. կըսէին, որ սիրուն, սրամիտ և եռանդուն աղջիկ մը եղած եմ. ճիշտ է, որ ամեն տեղ սիրով ու գորովանքով կրնդունէին զիս և ամենէն խստաբարոյ կիները ու մարդիկր ներողամիտ էին իմ արձակունակ զուարթութեանս համար, որ դիւրաւ կը զեղուր և դուրս կելլէր ընդունուած և գծուած սահմաններէն։ Եմ շնորհս, ճաշակս և մանաւանդ, դիւրահաղորդ բնաւորութիւնս համակրելի կը դարձնէին զիս և առաջին անգամէն զինաթափ կընէին ամենէն խոժոռները. իսկ ես հաճոյքով կանդրադառնայի իմ յատկութիւններուս։ Սակայն հայելին շատ շողոքորթիչ չէր ինձի համար, գոնէ ես ինքզինքս գեղեցիկ չէի գտնար, թէև շատ կանուխէն ականջներս սովոր էին լսել հիացմունքի մրմունջներ իմ շագանակագոյն առատ մազերուս, իմ մորթիս յղկուն մաքրութեան և իմ աչքերուս անսովոր պայծառութեան նկատմամբ։ Ասոնցմէ զատ իմ հարուստ և զօրեղ կենսականութեանս անհամար և յարափոփոխ արտայայտութիւնները չէին կարող իմ ուշադրութիւնս հրաւիրել, քանի որ ես հայելիին մէջ կը փնտրէի միայն գեղեցիկ գիծեր և թերևս նաև պայմանադրական գեղեցկութեան գիծեր, որոնցմէ զուրկ էր իմ դիմագիծս։ Հաստատ համոզուած ըլլալով, որ կը սխալին զիս սիրուն գտնելով, գոհ էի սակայն, որ կըսխալին, և յոյս ունէի, որ երկար ատեն պիտի սխալին։
Իմ հայրս բարեկեցիկ, բայց մանաւանդ համբաւ ունեցող մարդ մըն էր, և իր շուքէն բան մը կը զարդարէր նաև զիս. այնպէս որ ես չեմ ունեցած վարանումի և սպասումի այն տարիները, որ այնքան կը դառնացնեն օրիորդներու կեանքր և զանոնք կը դարձնեն կեղծ, խորամանկ ու ճարպիկ։ Տակաւին գրեթէ երեխայ էի, երբ սկսած էին զիս ամուսնութեան ուզել և հայրս ժպտելով կը գանգատէր. «ի՞նչ սատանայ ունի այս աղջիկը իր մէջ. հանդարտ չեն կընար նայել իրեն»։ Ինքը հակառակ իր փորձառութեանը չէր հասկնար, բայց ես արդէն գիտէի, որ իմ թեկնածուներս
