Էջ:Grigoris Aghtamartsi, Taghs (Գրիգորիս Աղթամարցի, Տաղեր).djvu/52

Վիքիդարանից՝ ազատ գրադարանից
Այս էջը սրբագրված է

Որպէս գանձ և պարգև ըստանի.
Եւ մը նայ սուրբ Նըշան յարքունի.
Մինչ ի կոյսըն չքնաղ նազելի,
Հռիփսիմէ հարսնացեալ Յիսուսի:

Յարքայէն ամբարիշտ նա փախչի,
Ընկերօքն իւր ամբիծ ի մարմնի,
Եկն յերկիրըն Մոգաց գաւառի
Եւ ետ պարգև ըզՆըշան տէրունի:
Ասացեալ Գրիգորիսըն գերի,
Որ կապեալ կայ մեղօք ի տոռի.
Հրամանաւ րաբունւոյն Գրիգորի,
Զնա առնէք յիշելոյ արժանի:
Եղանակողք գանձիս և տաղի,
ժըրաջան կանգնողացդ յատենի,
Միաբան դուք ասէք ողորմի.
Մըկրտիչ անարժան գըծողի:
Եւ զանկեալքն ի յայսոցըն չարի
Գըթասցի ողորմածն ամէնի,
Նըշանաւ սուրբ խաչիւս բըժըշկի
Եւ օրհնեն ըզտըւողըն շնորհի:


ՅՈՐԴՈՐԱԿ է


Վառեալ լուսովն աստուածային
Փայտըն կենաց սըրբոյ Խաչին
Թագ և պըսակ նախաստեղծին
Եւ խորտակող դիւաց գընդին