Վիքիդարանից՝ ազատ գրադարանից
Jump to navigation
Jump to search
Կընդրուկ և զըմուռ հալուէ,
Անճառ հոտ ի քէն բուրէ,
Նիւթ քո ի կենաց ծառէ,
Տաճար լուսոյ մայր սուրբ կոյս:
Հոտ քո զանազան ծաղկանց,
Դուն առեալ յարեգականց,
Զիս արա՛ լուսաթափանց,
Տաճար լուսոյ մայր սուրբ կոյս:
Զայն տուր ինձ, ո՛վ տարփալի,
Մարմինս իմ նուաղեալ մաշի,
Սիրով ծարաւիմ յոգի,
Տաճար լուսոյ մայր սուրբ կոյս:
Ղամբար վառեալ լուսաւոր,
Խորհուրդ ծնընդեան քո խոր,
Սքանչելի չըքնաղ և նոր,
Տաճար լուսոյ մայր սուրբ կոյս:
Ծոխ և ճառագայթ բազմիս,
Ընդ դասս անմարմնոց հրճուիս,
Փրկեա՛ ի հըրոյն զհոգիս,
Տաճար լուսոյ մայր սուրբ կոյս:
Մաքուր աղաւնի, տատրակ,
Սիրամարգ ոսկէտեսակ,
Գարնան աւետեաց գուշակ,
Տաճար լուսոյ մայր սուրբ կոյս:
|
|