Էջ:Hagop Baronian, Collected works, vol. 10 (Հակոբ Պարոնյան, Երկերի ժողովածու, հատոր 10-րդ).djvu/199

Վիքիդարանից՝ ազատ գրադարանից
Այս էջը սրբագրված է

— Ղալաթիո թընելի՞ն հետ պիտի միանա, չէ նե զատ պիտի բանի։

— Այս թընելը զատ պիտի բանի, բայց ասիկա շատ պիտի վաստկի, որովհետև կառք չունի, որ կոտրի, թել չունի, որ բրդի։

— Ի՞նչպես կերթան կուգան կոր։

— Ոտքով երկար ճամբա չէ արդեն։

— Ուսկի՞ց կերթա կոր, մինչև ո՞ւր կերթա կոր։

— Քեոմյուրճյանի սենյակեն, Սարաֆյանի սենյակը։

Քառասուն քայլ հեռավորությամբ պզտիկ ճամբորդություն մը։

— Ատ ընկերությունը ի՞ն կրնա վաստկիլ ատով։

— Ատ ընկերությունը առջի գիշեր ժամվան մեջ չորս հինգ հազար ոսկի է վաստկեր, Քեոմյուրճյանի սենյակը մտեր, քասան բացեր, մեջինները առեր գացեր է։

— Գողությո՞ւն։

— Կը հարցունե՞ս։ — Ատանկ է նե մենք ալ սա մեր սենյակը փորել տանք, Խիկա՛ր, տակեն բան մը չելլա՞։

— Մի՛ վախնար դուն, քուկին թրնել ըսածդ հարուստ մարդոց սենյակներուն տակեն միայն կը բանի։

— Գետնին տակը անցնի այն թընելի ընկերությունը, որ մեզի նոր տեսակ գողություն մ՝ալ սորվեցնելու պատճառ եղավ։

— Ի՞նչ վնաս ունի. անցյալները լրագրի մը մեջ կարդացի, որ եվրոպացի մարդուն մեկը մուրացկանության արվեստ սորվեցնելու համար աշակերտ կը փնտրեր...

— Մուրացկանությունը անոնք գան թո՛ղ մեզմե սորվին, անոնք թեորին գիտեն, իսկ մենք բրաքթիքով կը սորվինք տե՝ անոնցմե աղեկ կեփինք արվեստին մեջ։

— Իմ ըսելիքս ատ չէ. իմ ըսելիքս սա է, որ մենք ալ գողության դաս կուտանք անոնց։

— Աղեկ հույն դասատու մը բռնելու է։

— Հայն ինչո՞ւ ըլլա, մեր ազգեն մեկը թող վաստկի։

— Գողության դասատուն հայ ըլլա նե՝ հունաց արժանապատվությանը կը դպչի, դուն այս գործը անոնց ձգե, ինչու որ մենք գողության դասատու չկրնալ ըլլալնես զատ, աշակերտ անգամ չենք կրնար ըլլալ։