— Ի՞նչ խորհուրդ կուտաք։
— Հը՛։
— Մարմինս քիչ մավելի աշխատցնեմ նե ի՞նչպես կըլլա։
— Անշուշտ աղեկ կըլլա. երբ մարմինը շարժման մեջ է, հարկավ աղեկ է։
— Մաքրողական դեղ մը առնեմ նե։
— Շատ աղեկ խորհեր եք. ի՞նչ մաքրողական պիտի առնեք։
— Որոշած չեմ տակավին։
— Աղեկեն առնելու ես։
— Փեհլիվան յագըսի փակցունելու միտք ունեի աս առտու։
— Փեհլիվան յախըսի... ընտիր գաղափար։
— Ի՞նչ մեծությամբ ըլլալու է։
— Սովորական մեծությամբ։
— Ավելի մեծ ըլլա նե։
— Ավելի աղեկ ա։
— Ի՞նչ պիտի տանք ձեզի։
— Կես ոսկի։
— Հրամմեցե՛ք. ո՛հ... աղեկ ըլլամ տե...
— Հանդարտ եղեք։
— Ծառա եմ... ընելիքներս ասոնք են, ուրիշ բան մը չկա՞ լա։
— Այո՛, չկա (մինչև դուռը կ՝երթա)։ Նորեն եկուր զիս տեսնելու։
ՊԱՐՏԱՏԵՐԻ ՄԸ ՀԵՏ
Դու. — Սիրելի բարեկամ, ես ալ քեզի կը փնտրեի կոր։
Պսւրտատերը. — Ստակ ունի՞ս։
— Բնավ չունիմ. ուստի, քանի որ դուք իմ նախախնամությունս եք...
— Ներեցեք. ադ խոսքերը շատ լսեցի. այսօր անպատճառ բան մը տալու ես։
— Տղա՞ ես, ինչ ես.
— Տղա մղա չիյտեմ։
— Ատոր խոսքը գոցե։
— Չեմ գոցեր, մանավանդ թե ընկալագիր մալ պատրաստած եմ, որ տալիք ստակդ մեջը գրեմ, ստորագրեմ ու քեզի տամ։
— Քանի՞ ղուրուշի է ընկալագիրը։
— Հինգ ոսկիի։