ԱՆՈՒՅՇ
Բնավ չեմ մոռնար, օր մը քու բարեկամներեդ մին ըսավ թե «Սիրտդ չկոտրի, Պաղաասարն աղեկ մարդ է, բայց կոշտ է, հետը խոսք չըլլար բնավ»։ Այս խոսքին վրա տուն դարձեր եմ և երկու ժամ նստեր, լացեր եմ։ Ոմանք ալ, չգիտնալով որ կինդ եմ, որովհետև չկա մեկն որ զքեզ վայլեցնե ինձի, զքեզ կը բամբասեին և անանկ ծիծաղաշարժ գործերդ կը պատմեին, որ լսելով, կամչնայի հայտնել թե կինդ եմ։ Ի՞նչ կընեի, սիրտս կը դնեի, կուլայի և քեզի բան մը չէի ըսեր, միշտ կը ջանայի սակայն, որ մարդ ըլլաս և ընկերությանց մեջ մտնես ելնես, և այս բոլոր ջանքերս րոպեի մը մեջ մոռցվեցան։ Աղեկ, աղեկ:
ՊԱՂՏԱՍԱՐ
Եվ այս ամենը կընեիր ուրիշ մը սիրելու համար:
ԱՆՈՒՅՇ
Զո՞վ սիրած ունիմ:
ՊԱՂՏԱՍԱՐ
Դուն ինձմե աղեկ գիտես:
ԱՆՈՒՅՇ
Նախանձը խանգարած է քու դատողությունդ և հաճեր ես երևակայել, որ անպատիվ տնե մը դուրս ելած ըլլամ:
ՊԱՂՏԱՍԱՐ
Աչքերովս տեսա:
ԱՆՈԻՅՇ
Այնուհետև փաստաբաններու դիմեր ես զիս արձակելու միջոցներուն վրա խորհրդակցելու, զիս աշխարհի առջև ծաղր ու ծանակ ընելու և որպես թե բռնաբարյալ պատիվդ պաշտպանելու համար։
ՊԱՂՏԱՍԱՐ
Այս ամեն միջոցներու պիտի դիմեմ, որպեսզի ժամ առաջ բաժնվինք իրարմե։