Էջ:Hagop Baronian, Collected works, vol. 1 (Հակոբ Պարոնյան, Երկերի ժողովածու, հատոր 1-ին).djvu/426

իրենց որովայնն պարարելու համար, սիրամարգի պես զարդարվելու համար, կառքերով պտըտելու, թատրոններ, պարահանդեսներ երթալու համար։ Հայր մը սիրվելու է հայր ըլլալուն համար, խնայվելու է հոր քսակին, խնայվելու է հոր մը արտին... անպիտաններ... (Կը մեկնի):

ՏԵՍԻԼ Թ.

ՄԱՐԳՐԻՏ հետո ՄԱՐԳԱՐ

ՄԱՐԳՐԻՏ

Խոսք չհասկնար, որ զգացունես իրեն, թե պայման ունի չորս տարի զիրենք տանը մեջ պահելու։ Պայման մը, ինչ որ ալ ըլլա, հարգվելու է երկու կողմեն։ Եվ անոնք միթե հանցավոր են հարգելով իրենց պայմանները։ Երկու երեք ամսվան մեջ քաշածներս Աստված միայն գիտե. և ասոնք հերիք չէին, Վարդիկն ալ խնդիր մը հարույց...

ՄԱՐԳԱՐ

Հո՞ս եք, տիկին:

ՄԱՐԳՐԻՏ

Ժամանակին հասար։ Մեր հոգեկան ցավոց բժիշկն ես դուն, երբ անկեղծ խորհուրդներու պետք ունենանք՝ զքեզ կը կանչենք:

ՄԱՐԳԱՐ

Շատ կը բարձրացնեք զիս, տիկի՛ն։

ՄԱՐԳՐԻՏ

Ձեր ազնվությունն է այդ։ Չգիտեմ ինչպես մտեր է Վարդիկին մտքին մեջ կարգվելու գաղափարը:

ՄԱՐԳԱՐ

Վարդի՞կը... բայց ինձի հասակակից է նա...