Էջ:Hagop Baronian, Collected works, vol. 4 (Հակոբ Պարոնյան, Երկերի ժողովածու, հատոր 4-րդ).djvu/108

Վիքիդարանից՝ ազատ գրադարանից
Jump to navigation Jump to search
Այս էջը սրբագրված է


— Քումանտուրոսին տեղը ո՞վ դնենք։


— Տելի Յորկին գրեք։


Եվ կուզե քիչ մը բան ուտել, հազիվ թե պատառ մը բերանը կը տանի, մեկը կը մտնա։


— Տելի Յորկին չուզեր կոր։


— Քոնթոսթավլոսին տվեք։


— Շատ աղեկ։


Թագավորն կը կարծե, թե հրաժարականի խնդիրն լմնցավ, բայց պատառը բերանը նետելու միջոցին մեկը կը ներկայանա։


— Քոնթոսթավլոսն ալ չուզեր կոր։


— Տելի Յորկին ինձի ղրկեցեք։


Թագավորը սեղանեն ելնելու կստիպվի ու սենյակին մեջ պտըտիլ կսկսի։


Դուռը նորեն կը բացվի։


— Տելի Յորկին չգար կոր, Քումանտուրոսին տեղը մեկը ընտրեցեք շուտ մը։


— Բայց Տելի Յորկիին ըրածն ալ խենդություն է, ինչո՞ւ չընդունիր կոր։


Թագավորը բարկությունը անցունելու համար վար կիջնա, պարտեզին մեջ կը պտըտի։


Մարդ մը կելլա դիմացը։


— Քումանտուրոսին տեղը պարապ է։


— Դուն գնա՛, նստե՛։


— Չեմ ընդունի՛ր։


— Տելի Յորկին ինձի ղրկե՛։


Թագավորը պառկելու կերթա, հազիվ թե աչքերը կը գոցե, սենյակին դուռը կը զարնվի, թըք, թըք, թըք։


Թագավորը գիշերազգեստով կ՝ելնե ան կողնեն ու կը հարցունե.


— Ի՞նչ կա դարձյալ։


— Տելի Յորկին չի կրնար կոր գալ, տեղը պարապ պիտի մնա այս գիշեր։


— Թող այս գիշեր անանկ անցնի, վաղը բան մը կրնենք:


— Ինչո՞ւ թագավորը քիչ մը հանգիստ չեք թողուր, կը պոռա անդիեն թագուհին։