Էջ:Hagop Baronian, Collected works, vol. 4 (Հակոբ Պարոնյան, Երկերի ժողովածու, հատոր 4-րդ).djvu/164

Վիքիդարանից՝ ազատ գրադարանից
Այս էջը սրբագրված է

Սերվիո մեջ գտնվող այս Հավասին գործակատարը, Հերսեկի ապստամբության տաք ժամանակները, իմանալով, որ Միլան իշխանին տիկինը հղի է, կելլա օր մը իրեն կերթա։


— Իշխանուհի՛, կըսե, ձեզի բան մը պիտի աղաչեմ։


— Կրնաք աղաչել։


— Ներեցե՛ք, ընելիք հանդգնությանս, բայց մեր գործը կը պահանջե, որ քիչ մը հանդուգն ըլլամ։


— Ի՞նչ կուզեք:


— Ձեղի բան մը պիտի հարցունեմ։


— Հարցուցե՛ք։


— Իշխանուհին երբ պիտի հաճի աշխարհ բերել յուր զավակը։


— Կր կարմրցնեք զիս։


— Կաղաչեմ, ըսեք... կը վախնամ, որ Պորտեանոն ինձմե առաջ կուտա այդ լուրը և ես հացես կը զրկվիմ:


— Զարմանալի հարցում մը կըներ։


— Շատ երախտագետ պիտի ըլլայի ձեզի, եթե ըսեիք՝ թե բերելիք զավակնիդ մանչ է, թե աղջիկ, թեպետև ձեզի համար մեծ նշանակություն չունի, բայց քաղաքականի կերպարանք ունի ձեր զավակին գալիք օրը առաջուց գիտնալը։


— Քանի որ քաղաքականի կերպարանք ունի, Միլան իշխանին հարցուցեք, քաղաքական խնդիրները ան աղեկ գիտե։


— Շատ լավ, կըսե ու Միլանին քովը կառնե շունչը։


— Կը խնդրեմ, իշխան, բարեհաճիք ինձ ըսել ձեր զավկին գալիք օրը, որովհետև բոլոր աշխարհի հեռագիր պիտի քաշեմ։


— Շնորհակալ եմ, կը հուսամ, որ ամիսե մը կուգա։


(Ինչպես եղեր է, որ Միլան Կորչաքոֆին չհարցուցած վճռողական կերպով պատասխան մը տվեր է, որովհետև Կորչաքոֆին չհարցուցած՝ բան մը չխոսիր)։


— Կրնա՞մ վստահ ըլլալ ձեր խոսքին և իբրև ստույգ աղբյուրե քաղված լուր մը ըմբռնել ձեր ըսածը, չըլլա՞ որ խաբե՛ք զիս, իշխան։


— Վստահ եղիր։