Էջ:Hagop Baronian, Collected works, vol. 4 (Հակոբ Պարոնյան, Երկերի ժողովածու, հատոր 4-րդ).djvu/197

Վիքիդարանից՝ ազատ գրադարանից
Այս էջը սրբագրված է

կը զարմանամ, թե ինքզինքը ձախակողմյան անվանող կորսակցությունը ինչո՛ւ հանդիմանության քվե չէ առաջարկեր այն եվրոպացիին համար, և ինչո՛ւ գոհունակության քվեով չէ պատվեր Օգսեն էֆենտիին։


Օգսեն էֆենտին կըսե նաև թե, իբրև հայհոյություն չէ ըրեր այդ խոսքը։ Ավելորդ է ըսել, որ անշուշտ Վարչության պատիվ մը ընելու համար ըրած է։ Որքան պարապ և տղայական ալ ըլլան Օգսեն էֆենտիի մեջ բերած փաստերը, սա շիտակ է, որ յուր խոսած ատենաբանությանը մեջ քանի մը տեղեր հետս կոչած է այդ էտեպսիզություն բառը։ Վարչության փափկասիրտ և ազնվասիրտ մեկ քանի անդամներն ալ այդ հետս կոչումով թող շատանային և հոն գտնվող ունկնդիրներու ծիծաղը չշարժէին և Ընդհանուր ժողովո երկու նիստերն իրենց պահանջմանց չզոհեին։


Կը բարեմաղթենք, որ ատենապետ փաշան սա էտեպսիզության վերջ տա և ժողովրդյան գայթակղյալ մտքերը բժշկե։


Շաբթուս ներքին լուրերու մեջ ամենեն հետաքրքրականն ու զվարճալին հեռագրատան խնդիրն է։


Շաբաթ օրը մարդուն մեկը հեռագրատուն կերթա Բարիզ հեռագիր մը ղրկելու համար։


— Պաշտոնյան ո՞ւր է, կը հարցնե։


— Ի՞նչ պիտի ընես, կը պատասխանե դռնապանը։


— Հեռագիր մը պիտի տամ։


— Հոս չէ, ոստիկանության դուռն է:


— Ընկեր մը ուներ, ան ո՞ւր է։


— Ան ալ ոստիկանության դուռն է։


— Վերեն մեկը կանչե, գա սա նամակս առնե։

— Վերը մարդ չկա, ամենքն ալ ոստիկանության դուռը գնացին։


— Այս հեռագիրս ոստիկանության դուռը տանիմ անանկ է նե։


— Չէ՛, չէ՛, քանի մը շաբաթ սպասե՛, և վերջեն դարձյալ հոս բեր։