Էջ:Hagop Baronian, Collected works, vol. 4 (Հակոբ Պարոնյան, Երկերի ժողովածու, հատոր 4-րդ).djvu/227

Եվ սակայն այս քաղաքագետք օրինաց պահանջած արարողություններն ալ կատարելու մեծ փույթ կը տանին։

Օրինակի համար. Ռումանիա հայտնապես ի նպաստ Ռուսիո կը գործե։

Անգղիան, Ավստրիան և Ֆրանսան օրենքը տեղր տանելու համար իրեն կըսեն.

— Եթե այս պատերազմին մեջ Ռուսիո հետ միանաս Բարիզի դաշնադրությամբ նվիրագործյալ առանձնաշնորհություններեդ պիտի զրկվիս՜։

Ռումանիա անշուշտ սա իմաստով պիտի պատասխանե.

— Աստված չընե, որ չեզոք դիրքես դուրս ելնեմ։

Այս պատասխանը տալեն ետքը՝ թող պիտի տա Ռուսիո անցնիլ Բրուտեն, և անկե ետքը պիտի պոռա.

— Հրապարակավ կը բողոքեմ Ռուսիո դեմ իմ երկիրս մտած ըլլալուն համար։

Եվ բողոքելուն պես չեզոքություն պահածի պես պիտի ըլլա։

Կաղաչեմ, ընթերցողք, ելեք նայիմ սա խնդրույն մեջեն։

— Խիկա՛ր, նոր բան մը ունի՞ս։

— Չունիմ, քարատաղցոց հետ կռիվն սկսա՞վ։

— Տակավին ոչ։

— Հապա կըսեին որ մեր զորքերը Նիքսիչը պարենավորելու պիտի աշխատեին, քարատաղցիք ալ պիտի արգիլեին ու...

— Այո՛, այնպես կըսեին, բայց հիմա ալ կըսվի, թե նիքսիչի զորքերը 15 օրվան համար ուտելիք ունին եղեր։

— Աստվածդ սիրե՛ս։

— Այո՛։

— Ի՞նչ կ՝ըսեք։

— Ի՞նչ կա։

— Ո՞ւր էր թե ես ալ նիքսիչ ըլլայի։

— Ինչո՞ւ։

— Ինչո՞ւ... որովհետև ես վաղը առտվան համար ուտելիք չունիմ...