Էջ:Hagop Baronian, Collected works, vol. 4 (Հակոբ Պարոնյան, Երկերի ժողովածու, հատոր 4-րդ).djvu/405

Մաքսատան տնօրենությունն որո՞ւ ծախե ասոնք, թաշկինակ, գուլպա կամ գավաթ չեն, որ վաճառականներու ձախե։

Ահա այնպիսի ապրանք մը, որ ո՛չ կառնվի և ո՛չ կը ծախվի... գոնե իրենց մականունը փոխեին թշվառականներր... Հիսուսյան... ի՞նչ անպատվություն Հիսուսի...

9 հուլիս

Թնդանոթ նետեցե՛ք...

Վերջապես Ազգային երեսփոխանական ժողովո բացումը տեղի պիտի ունենա հառաջիկա ուրբաթ օրը, հուլիսի 11-ին։ Բոլոր երեսփոխաններն հրավիրված են, ինչպես որ սովորություն է, ներկա գտնվիլ, ունայն խոսքեր ընել և իրենց ազգասիրական պարտքը կատարել։

Սրբազան Պատրիարքն պիտի բանա ժողովն և բացման առթիվ պիտի խոսի հայ քաղաքականության վրա։

Ազգայիններն անհամբեր հուլիս 11-ին կսպասեն՝ Պատրիարքին բերնեն ավետիս առնելու համար։

Ես ալ սպասեմ ուրեմն։

10 հուլիս

Վերջին Ռուս թուրքական պատերազմը չհրատարակված՝ Միդհատ փաշան ընդհանուր ժողով գումարեց հոս և ամեն ազգի գլուխները հրավիրելով իրենց հարցուց.

— Թող կուտա՞ք, որ մեր կառավարության անկախությանը վնասեն։

— Թող չենք տար, թող չենք տար, պատասխանեցին իրեն։

— Ռուսիո դեմ կուզեք պատերազմիլ։

— Այո, պատերազմիլ կուզենք, կուրծքեն զարնվելով մեռնել կուզենք, քան թե մեր անկախությունը վնասված տեսնել... о՜, մեր անկախության մատ չենք դպցուներ, այդ չլլար։