Էջ:Hagop Baronian, Collected works, vol. 4 (Հակոբ Պարոնյան, Երկերի ժողովածու, հատոր 4-րդ).djvu/558

Վիքիդարանից՝ ազատ գրադարանից
Jump to navigation Jump to search
Այս էջը սրբագրված է


ԱՆՁՆԱՆՈԻՆՆԵՐԻ ԲԱՌԱՐԱՆ

Ազատախոհյան Ա., տե՛ս Տեմիրճիպաշյան Եղիա։

Ազարյան Ստեփանոս (1826—1899), Վիեննայի Մխիթարյանների մոտ ուսած կաթոլիկ հոգևորական, հետագայում՝ Պոլսի կաթոլիկների պատրիարք։

Ալաճաճյան Համբարձում (1840—1907), Խմբագիր «Փունջ» (1860—1907) և «Փնջիկ» (1864—1866) թերթերի:

Ալի էֆենտի, «թասիրեթ» թուրքական թերթի խմբագիր։

Ալֆիերի, Վիտտորիո (1749—1803), իտալական բանաստեղծ, կլասիցիստական ողրերգության ստեղծողը Իտալիայում։

Ալֆոնս, XII (1857—1885), Իսպանիայի թագավոր (1874—1885)։

Աղաբեկյան, Մարկոս (1831—1908), հրապարակախոս-լրագրող, խմբագրեր է «Կռունկ Հայոց աշխարհի» (1860—1863) և «Ծիլն Ավարայրի» (1866—1867) ամսագրերը, որոնցից առաջինը լույս է տեսել Թիֆլիսում, իսկ երկրորդը՝ Պոլսում։

Այվազյան Աբրահամ (1846—1909), բանասեր, գրականագետ, թատերական գործիչ, առաջին թարգմանիչը «Մարսելյոզի», և հեղինակ մի շարք աշխատությունների, որոնցից հայտնի է 1893 թվականին Պոլսում լույս տեսած «Շար հայ կենսագրությանց» երեք մասից բաղկացած գիրքը։

Այվատյան, Մատթեոս (1830—1876), ժամանակի առաջավոր մտավորականության ներկայացուցիչներից, հարել է Հ. Սվաճյանի «Մեղուին», եղել է Մ. Նալբանգյանի ազատագրական պայքարի հետևորդներից, հրատարակել է «Արարատ» (1869—1872) շաբաթաթերթը, որի շարունակությունը նույն անվամբ լույս է տեսել 1876 թվականին հայատառ թուրքերեն լեզվով։

Անաքսաքորաս, Անաքսագորաս (500— 428 թ. մ. թ. ա.), հին հունական փիլիսոփա:

Անթոնելլի, Անտոնելլի Հակոմո (1806—187.6), կարդինալ, Պիոս IX պապի քարտուղարը։

Անտիսֆենես, Անգիսթենես (մոտ. 435—370 թ. մ. թ. ա։), հին հունական փիլիսոփա, աշակերտը Սոկրատի։