Էջ:Hagop Baronian, Collected works, vol. 4 (Հակոբ Պարոնյան, Երկերի ժողովածու, հատոր 4-րդ).djvu/96

Ահավասիկ սուտ մը. եթե Աստված ճնշյալները փրկել ուզեր՝ նախ և առաջ հայերը քյուրտերու ձեռքեն կը խալսեր և ետքն ալ լրագրաց վրայեն փուլը կը վերցուներ։

Այնպես չէ՞, ո՜վ ազատախոս լրագրաց մեծապատիվ խմբագիրք։

<32>

Հարուստ կնկան մեկը, օր մը երկու մուշտակագործ կը կանչե և անոնցմե արջու մորթ մը կուզե, իմացնելով, թե պատրաստ է վճարել, ինչ գին որ ուզեն։

Երկու մուշտակագործները, որոնց մին և երկրորդը Ա... պիտի կոչենք, դրամական տագնապի մեջ գտնվելով՝ կընդունին կնկան այս առաջարկությունը, սակարկությունը կընեն և մեջերնին կորոշեն անտառ երթալ ու արջ մը սպաննել։

Այս որոշման վրա, այս երկու բարեկամները, օր մը դաշտը կելլան, անտառի մը մեջ կը մտնեն և ծառի մը ետևը կը պահվտին, որ արջը տեսնելնուն պես՝ հրացանով սպաննեն: Քանի մը վայրկյան կանցնի չանցնիր, արջը կսկսի խառնչել: Ա... արջին խառնչյունեն վախնալով՝ հովիվի մը խրճիթին մեջ կը մտնե և դուռը կը գոցե։ Թ... փախչելու ժամանակ չգտնելով՝ իսկույն գետինը կը պառկի, շունչը կը բռնե ու վարպետությամբ ինքզինքը մեռյալ կը ցցունե: Արջը, որ նույն միջոցին մոտեցած էր, պառկողին քովը կերթա, կը հոտվըտա ու տեսնելով որ մեռյալ է կը ձգե կերթա, (այն ատենվան արջերը սովորություն ունեին, որ մեռյալներուն չէին դպչեր և Ա... այս չէր գիտեր)։ Ա... որ միշտ դռան ծակեն դուրս կը նայեր, արջուն հեռանալը տեսնելուն պես դուռը կը բանա, դուրս կելլա և իր ընկերին կը հարցունե.

— Արջը ի՞նչ ըսավ ակաջդ ի վար։

— Ըսավ, որ մեյ մալ երկդիմի մարդու հետ արջ սպաննելու մի՛ երթար։

Բարոյական. — Ով որ Ավստրիո խոսքին կը հավատա միշտ մինակ կը մնա։