Տիկին է․․․ և օրիորդ Ը։․․. ինչպես նաև Թ... և Ժ... տիկիններն նույնիմաստ բարեմաղթություններով իրենց պարտականությունն վճարեցին պարոն Կուռնելիոսին և իրենց պաշտոնակիցներուն քով բազմեցան։
Ավելորդ չէ նշանակել, թե քանի մը կիներ պարոն Կուռնելիոսին թևը մտան և անկյունն բազմեցուցին զայն։
Պարոն Կուռնելիոս չվարած քանի մը վայրկյան կիները դիտելեն ետքը, թեմպեքիի քսակն հանեց և միջնորդներուն դառնալով հարցուց.
— Մեյ մեկ նարկիլե կը խմե՞ք։
Կիները խնդացին քրքիջով։
— Ինչո՛ւ խնդացիք, հարցուր պարոն Կուռնելիոս պաղ արյամբ։
— Որովհետև մենք նարկիլե չենք խմեր, պատասխանեցին կիներն միաբերան։
— Նարկիլե չխմողները կը խնդա՞ն այս քաղաքին մեջ։
— Ոչ... բայց... որովհետև... իրավ որ մեր խնդալն պարապ բան է, կարծեմ ձեր քաղաքը կնիկները նարկիլե կը խմեն։
— Կան որ կը խմեն, կան որ չեն խմեր... բայց նարկիլե խմելը․․․
Տիկին Ա. — Նարկիլեի խոսքը մեկդի դնենք, պարոն Կուռնելիոս... իմ հոս գալուս պատճառն հարկավ գուշակած եք, ես կարգվիլ ուզողներուն աղջիկ կը գտնեմ և....
Տիկին Բ. — (Ընդմիջելով) Ես ալ, պարոն Կուռնելիոս, աղջիկ կը գտնեմ և ինչ գեղե....
Տիկին Գ. — (Ընդմիջելով) Իմ արհեստս ալ այս է, ձեռացս տակ անանկ աղվ...
Տիկին Գ. — (Ընդմիջելով) Դուն ինձի մտիկ ըրե, պարոն Կուռնելիոս.... տատրակի պես....
Տիկին Ե. — (Ընդմիջելով) Ինչո՞ւ քեզի մտիկ պիտի ընե եղեր.... ադամանդի պես աղջիկներ կը բե.....
Տիկին Զ․ — (Ընդմիջելով) Ի՜նչ պարկեշտ և ուսումնական աղջիկներ ունիմ ես..... անանկ դաշնակ կը զարնեն և անանկ կը պարեն, որ կարծես թե մեյ մեկ հրեշտ.....
Տիկին է․ — (Դարձյալ ընդմիջելով) Հապա իմիններս, որ ֆրանսերեն կը խոսին և.....
Օրիորդ Բ․ — (Ընդմիջելով) Երեսուն տարիե ի վեր այս արհեստին մեջն եմ և այն ամեն անոնք, որոնց աղջիկ գտած եմ, շատ գոհ եղած են և ․․․․․