ԻՆՉՈ՞Ւ ՀԱՄԱՐ, ՈՐՈՎՀԵՏԵՎ
Ինչո՞ւ համար հայերուն կապը օր օրի կը թուլնա.
— Որովհետև օր օրի խելոքնալու ետևե են։
Ինչու համար հայ օրիորդները հիմա շատ դուրս կելնեն.
— Որովհետև հիմա իրենց դուռը շատ զարնող չկա։
Ինչո՞ւ համար Ազգային վարչությունը երկու ամիս կըլլա, համար տված չէ։
— Որովհետև հիմա արձակուրդ «վաքանսի» ժամանակ է։
Ինչո՞ւ համար հայերը ազատ ըլլալ կուզեն.
— Որովհետև օրն իրիկուն եղած է։
Ինչո՞ւ համար հայ տիկինները Բերայի մոտիսթրաներուն գտցած ատեննին առաջ Ղալաթիո եկեղեցին կը հանդիպին.
— Որովհետև առջի իրիկունը երդում ըրած են թե Փրկչին ուխտ ըրած են։
Ինչո՞ւ համար հայ լրագիրները իրարու լեզու չեն հասկնար.
— Որովհետև ամենն ալ մեկ մեկ տարբեր լեզվով կը խոսին։
Ինչո՞ւ համար Ագապյան վարժարանը երեք տարի է քննություն չտար.
— Որովհետև աղա, փաշա, քեյֆին քյահյան չըլլար։
Ինչո՞ւ համար լրագրաց գրաշարները իրենց շարածին սխալներուն ուշադրություն չեն ըներ.
— Որովհետև խմբագիրները իրենց գրածին ուշադրություն չեն ըներ։
Ինչո՞ւ համար հրեաներն ու հույները օր օրի կը հարստանան ու հայերը չեն հարստանար.
— Որովհետև Ավետարանը «Երանի աղքատներուն» կըսե։
Ինչո՞ւ համար արդի երիտասարդներուն շատերը ստակ ունեցող աղջիկ կը փնտրեն.
— Որովհետև շնորհք ունեցող աղջիկ առնելու հույս չունին։
