— Այսինքն մեր հիվանդությամբը անոր դեղարանը քաջալերենք:
— Այո՛։
— Քաղաքավարական ձևերն ու խոսքերն ժասանակով չափ մը ունեին, հիմա անոնք ալ իրենց չափը կորսնցուցին։
⁂
— Արևելյան թատրոն պիտի երթա՞ս։
— Կը խորհիմ կոր:
— Քաջն Վարդան պիտի ներկայացնեն եղեր, անկից ետք ալ հասարակության դյուրություն մը ըլլալու համար պարահանդես պիտի տրվի եղեր։
— Պարահանդեսները հասարակության դյուրությո՞ւն կուտան եղեր։
— Մինչև հիմա չէին տար, բայց ասկից վերջը պիտի տան, Արևելյան թատրոնի, այսինքն Ալքազաբի վարչությունը այդպես որոշեր է...
— Ես կը խորհիմ քիչ մը ընտանիքս առնելու և Ալքազարի պարոն երթալու...
Արդյոք քաջն Վարդան մեռնելեն վերջը պալո՞ տվավ...
⁂
— Բարեկամ, ինձի հարյուր ղուրուշ փոխ կուտա՞ս։
— Կուտամ, բայց պայմանով մը։
— Ի՞նչ պայմանով։
— Հաշիվներդ կը նայիմ, և թե որ գոհացուցիչ տեսնեմ նե՝ կուտամ։
— Անմի՛տ, հաշիվներս գոհացուցիչ ըլլային նե՝ քեզմե փոխ ստա՞կ կ՝ուզեի...
⁂
— Բարեկենդանը ինչպե՞ս կ՝անցունեք կոր։
— Այնչափ կը խմենք կոր, որ ինչպես անցնիլը չենք կրնար կոր իմանալ։
— Շատ խմելը վնասակար չէ՞։