պատասխանը կուտա և կուզե ճամբել, բայց ճարպիկ մուրացիկը առանց անկե հեռանալու կըսե. «Աղաս, ես հիմա չեմ ուզեր, խոսք տուր 5 փարա տալու և տարիե մը տուր, ես կը համբերեմ»։
⁂
Առջի օրը, մարդուն մեկը առնելիքը ուզելու համար դերձակի մը խանութ կերթա։
— Ստակս այսօր պիտի տա՞ս։
— Այսօր չեմ կրնար տալ, վաղը եկուր։
— Վաղը չեմ կրնար գալ այսօր տուր։
— Այսօր չեմ կրնար տալ, վաղը եկուր։
— Շատ մը շաբաթե ի վեր կուգամ կերթամ կոր, այսօր հարյուրերորդ անգամն է։
— Անգամ մ՛ալ եկուր հարյուր մեկ ըլլա։
— Դուն անառակ մես, դուն խաբեբա մես, ...դուն վատ մես...
— Է՛հ, բավ է, ըսավ այս միջոցին հոն ներկա գտնվողներեն մին. բավ է, հայհոյելե ի՞նչ պիտի ըլլա, լռե՛։
— Չէ՛, խոսելու ազատությունը հարգելու ենք, թո՛ղ խոսի, ըսավ դերձակը և գործը շարունակեց։
ՀԱՐՑ — ՊԱՏԱՍԽԱՆԻ
— Սիրահարությունը ի՞նչ է։
— Ամուսնութենե վերջը զիրար սիրելու երաշխավորություն։
⁂
— Սիրահարության մեջ ամենեն ավելի տուժողները որոնք են։
— Երիտասարդները։
— Այս արհեստին մեջ անձնվիրությամբ աշխատողները որո՞նք են։
— Տգեղ կիները։