մսելու ըլլան նե՝ դրացիին տունը միսաֆիրության կը ղրկես, հոն կը տաքնան։
— Ամեն օր միսաֆիրություն կըլլա։
— Ինչո՞ւ չպիտի ըլլա։
— Ամոթ է նե։
— Այնչափ բարակ մտածողն ալ թո՛ղ չմսի, էֆենտիմ։
⁂
— Եղբայր, այս գրած աղերսագիրդ ալ չէ եղեր։
— Ինչո՞ւ։
— Ես քեզի ըսի, որ մարդը շողոքորթես, որովհետև իրմե մեծ ակնկալություն ունիմ, ան ալ շողոքորթվի նե՝ ուզածս կը կատարե։
— Շողոքորթեցինք ա՛։
— Ավելի շողոքորթելու է, անիկա շատ շողոքորթվիլ կուզե։
— Անանկ է նե՝ տղաս, գնա, Մասիսին խմբագրին գրել տո՛ւր այդ աղերսագիրդ։
⁂
— Կարապետ աղա, սա մեր տղուն գործ մը գտնայիր։
— Շատ աղեկ, գտնամ, ի՞նչ կուգա ձեռքեն։
— Զեռքեն ինչ գալը չիյտեմ, բայց անանկ աղվոր ժիմնասթիք գիտե, որ չվանի վրայեն վազելով, ցատկելով կը քալե ու չիյնար։
— Աղեկ ա՛, թող Գարագեղի կամուրջեն առանց իյնալու կը քալեմ տեյի ծանուցում մը ընե, ամեն մարդ վազող վազողի սեյր ընելու կուգա, տղադ ալ սեպեպլենմիշ կըլլա։
⁂
— Իմացա՞ք, զավզավաթճի քահանան խալբախը ձգեր է։
— Իմացանք, Օրագիրը կը պնդե, որ մորուքն ալ ածիլեն։
— Մորուքն ածիլեն նե՝ նորեն չբուսնիր։
— Տղա՞ ես, Պատրիարքարանը խստիվ կը պատվիրե մորուքին, որ չբուսնի, մորուքն ալ Պատրիարքարանի դեմ վարված չլլալու համար, կամա ակամա ետ կը քաշվի։
⁂
— Մյուսյու տոքթոր, հիվանդնիս ի՞նչպես տեսար՝ այսօր։
— Առաջվան պես է. զարմանալի է, որ այսչափ դեղ տվինք ու օգուտ մը չըրավ։
