ՔԱՂՎԱԾՔ
< 2 >
— Տասն և ութ տարեկան աղջիկներն ավելի կը փափագին ամուսին մը ունենալ քան թե սիրահար մը․ բայց հիմա այնպես կը հագվին, որ իրենց չափազանց զարդարանքը սիրահարներ կը հրավիրե և ամուսինները կը հեռացնե։
— Սերը լուսնո կը նմանի, երբ որ չաճիր կը նվազի։
— Անտարբեր ապրող մարդը դեռ իր սիրելիք կինը տեսած չէ։
— Նախանձը միշտ սիրո հետ կ՛սկսի, բայց անոր հետ չվերջանար։
— Սիրուհիե մը քաշվիլը շատ անգամ զանի ձեռք ձգելեն ավելի դժվար է։
— Սերը հիվանդություն մէ, որուն բժիշկը նույն իսկ ինքն է։
— Ծաղկի հիվանդությունը կանանց Վաթերլոյի պատերազմն է․ հետևյալ օրը զիրենք իրոք սիրողները միայն կը ճանչեն։
— Պզտիկ աղջիկները պաճուճապատանքով կը խաբվին, մեծերն ալ երդումով։
— Հարսանիքե առաջ եղած սերն անվերջ գրքի մը սկիզբը դրված համառոտ հառաջաբանի մը կը նմանի։
— Կնոջ մը արժանիքը գեղեցկության ճառագայթով մը լուսավորվելու պետք ունի։
— Չար կնոջ մը ամենեն ավելի վնասակար անդամը լեզուն է։
— Ամուսինը սպեղանի մէ, որ աղջկանց բոլոր ցավերը կը բժշկե:
— Սերը շատ անգամ ամենեն ճարպիկ մարդը խենդ կընե և ամենեն խենդն ալ ճարպիկ կ՛ընե։
— Որչափ ալ կանանց և ամուսնության վրա ուզածնիս ըսենք՝ դարձյալ երկուքեն ալ չենք կրնար զատվիլ։