— Սերն ալ անձնասիրության կը նմանի, քիչով գոհ կըլլա, բայց ամեն բանի կը ցանկա։
— Սիրո շատ մը գործերն ալ լուցկի զարնելու կը նմանին, հարատևությամբ միայն կարելի է հաջողիլ. շատ անգամ ալ հուսահատության վայրկյանին մեջ կը հաջողին։
— Կանանց հանդգնությունը շատ անգամ արանց համբերության դեմ է որ կը կոտրի։
— Միշտ յուր սիրահարին վրա խոսող կինը խոհեմ չէ, իսկ բնավ չխոսողն ալ ճարպիկ չէ։
— Սիրո մեջ մեծ հաճույքները մեծ ցավերու խիստ մոտ են:
— Պարկեշտ կնոջ մը սիրտը սրահ մէ, ուր մտնելը արգիլյալ է առանց անդրասենյակը սպասելու։
— Սիրո մեջ ավելի կը հաջողին անոնք, որ սիրահար ըլլալ կը կեղծեն, քան թե անոնք, որք ճշմարտիվ սիրահար են։
— Երկու սեռին մեջ անհավատարմության տարբերությունը այնչափ իրական է, որ կրքոտ կին մը անհավատարմություն մը կրնա ներել, որն որ մարդու մը անկարելի է։
— Կնոջ մը սեթևեթը սեղան մէ անծանոթ չաստվածոց։
— Նախանձոտության մեջ ավելի անձնասիրություն կա, քան թե սեր։
— Կնոջ մը յուր տգեղ ըլլալը գիտնալը այնչափ դժվար է, որչափ յուր գեղեցիկ ըլլալը չգիտնալը։
— Մեծ քաղաքաց մեջ անմեղությունը մոլության վերջին ճաշն է։
— Կին մը երբեք մարդու մը համար ապերախտ է ըսելու չէ, որովհետև ասով իմացուցած կըլլա, թե ինքն է զայն ապերախտ ըլլալու կարող ընողը։
— Նախանձոտը ներողամտության արժանի են, որովհետև իրենք այնչափ կը վշտագնին, որչափ չեն վշտացներ։
— Տգեղ կնոջ մը խրատ մը միայն կա տալու, թո՛ղ հոգվույդ գեղեցկությունը դեմքիդ տգեղությունը ջնջե։
— Կնոջ մը՝ միայն զինքը սիրել երգվելե առաջ, պետք է կամ բոլոր կիները տեսած ըլլալ կամ միայն զայն տեսնել։
— Ամուսինը, սիրահարն անգամ գեղեցկության քուլիսներուն մեջ մեքենագործ մը, հուշարար մեն, այն որու համար կը խաղացվի խաղը, հանդիսականաց մեջն է։