Ընկերությունը այս մասին ալ անփույթ ըլլալու չէ, այս խեղճերին ալ մեղք է․ և ասանկ կառքերուն առջև են վազելով՝ օր մը չէ օր մը կառքերուն տակը պիտի մնան։
— Ի՞նչ է ասոր ճարը։
— Կառքերուն ետևեն վազելու են, որպեսզի իյնան նե՝ թրամվեյի տակը չերթան։
⁂
Մասիս անցյալ շաբթու քաղաքականության հորիզոնին վրա սև կետեր տեսեր է եղեր։
Թող Մասիս փառք տա Աստուծո, որ այդ կետերը սև են եղեր, որովհետև եթե ճերմակ ըլլային չպիտի կրնար տեսնել զանոնք։
⁂
— Տղա՛ս, ո՞ւր է ոտքի ամաններդ։
— Մայրի՛կ, Ալամպրայի առջևեն անցած ատենս ցեխերուն մեջ կորսվեցան, փնտրեցինք, փնտրեցինք չկրցանք գտնալ։
⁂
— Ո՞ւր կը վազես ասանկ։
— Տոքթոր Ֆիշերի։
— Ի՞նչ պիտի ընես հոն։
— Աչքերս պիտի ցցունեմ։
— Աչքերդ բան մը չունին։
— Ինչպես չունին, հանգանակության մասնակցեցա և ցուցամեջ անունս չեմ կրնար կոր տեսնել։
⁂
— Ի՞նչ տարբերություն կա կույրի մը և Եսայանի մեջ։
— Սա տարբերությունը կա, որ առաջինը չի տեսներ ինչ որ ամեն մարդ կը տեսնե. իսկ երկրորդը կը տեսնե, ինչ որ և ո՛չ մեկ մարդ մը կը տեսնե։
Ո՛վ Եղիշե բերանդ համբուրեմ։