— Ինտո՞ր ես, խաթուն։
— Մի՛ հարցուներ, զավակս, Հիվանդի մը տարին ինձի, երկու շաբաթ է որ քուն քնացած չունիմ: Բայց այս գիշեր հանգիստ կը քնանամ, ինչու որ հիվանդնիս հոգեվարք է։
Մարդս հիվանդ ունենալու և ասանկ կնիկ մը բերելու է, որ հիվանդին քովը նստի։
⁂
Անցյալ շաբթու կարդինալին մեկը սրբազան պապին կը ներկայանա։
— Ի՞նչ կ՝ուզեք, կը հարցնե սրբազան պապը։
— Ի՞նչ պիտի ուզեմ, պատկերահանին մեկը դժոխքի պատկեր մը շինած զիս ալ մեջը դրած է. աս ըլլալո՞ւ բան է։
— Ի՞նչ կրնամ ընել, եթե պատկերահանը զձեզ քավարանի մեջ դներ՝ կրնայի անկից դուրս հանել, բայց դժոխքի մեջ դրած է, ես ալ հոն զորություն չունիմ։
⁂
Կնկան մեկը, որ բնավ հիվանդ չէր, առջի օրը բժիշկ մը կանչել կուտա։
— Ի՞նչ ունիք, կը հարցնե բժիշկը։
— Կուտեմ, կը խմեմ, հանգիստ կը քնանամ։
— Շատ աղեկ, դեղ մը տամ քեզի, առտու իրիկուն անկից խմե՛, այս ըսածներուդ մեկն ալ չմնար, պատասխանեց բժիշկը։
⁂
Կնկան մեկը իր պատկերը քաշել տալու համար լուսանկարի մը կ՝երթա։ Աթոռին վրա նստելուն պես՝ բոլոր ուժը կսկսի թափել, որ բերանը շատ պզտիկ ելլա։
Պատկերահանը տեսնելով անոր այս ճիգը, կըսե․
— Ինքզինքնիդ մի նեղեք, տիկին, կուզեք նե՝ բերան ամենևին չեմ շիներ։
