Խորեն սրբազանը երբ անցյալները Իզմիրեն առաջնորդ ընտրվեցավ, հրաժարական տված էր ըսելով թե՝
— Ընտրությունը ապօրինավոր է, չեմ երթար։
Իզմիրի ժողովուրդը ասոր վրա օրինավոր ընտրությամբ դարձյալ զինը առաջնորդ կ՛ընտրեն, բայց գերապատիվ Խորեն սրբազան դարձյալ չերթար և երբ պատճառը հարցվի իրեն կը պատասխանե.
— Այս անգամ ալ չեմ երթար, որովհետև ընտրությունը օրինավոր է։
Հիմա իզմիրցոց կը մնա անանկ ընտրություն մը ընել, որուն կեսը օրինավոր ըլլա, կեսը ապօրինավոր, նայինք ան ատեն ի՞նչ կըսե նորին գերապատվությունը։
⁂
Ուսումնական խորհուրդը սկսավ քայլ առնել իր ասպարեզին մեջ։
Շաբաթն մը ի վեր դասատուները կը քննե և վկայականով կը վարձատրե արժանավորները։
Առջի օրը, դասատուներուն մեկը քննած ատեն հարցուց, թե տրամաբանություն ըսելով ի՞նչ կ՛իմանաս։
— Տրամաբանություն ըսելութ պատասխանեց դասատուն, Օրագիր կ՛իմանամ, սա տարբերությամբ, որ տրամաբանության մեջ նախադասությունները դնելեն ետքը եզրակացությունն ինքն իրեն՛ կելնե, մինչդեռ Օրագիրը ինք կը հանե և ուզածը կը հանե։
⁂
Մեղու անցյալ չորեքշաբթի ավուր թերթովը Ագապյան քոնսերին համար բացառական է, ըսած էր, այս բացառականին վրա Մանզումե (ղ) մը ավելցունելով՝ իր շաբաթ ավուր թերթին մեջ՝ պատմական ըրած է։
⁂
— Ծո՜, Կարապե՛տ, անցյալ շաբթու Օրագիրը չկարդացի՞ր, որ կ՛ըսեր թե գիշեր ատեն մեկը առանց լապտերի տանը դռան առջև կեցած ատեն զապթիեները բռներ տարեր են։
— Կարդացի։
— Կարդացիր նե՝ ինչո՞ւ սենյակիդ մեջ գիշեր ատեն առանց լապտերի կը պտըտիս կոր։