⁂
Լսեցի՞ք, Օհաննես աղան կնիկը թողեր, նոր կնիկ մը առեր է.
— Այո՛, դիտենք անիկա, ծանր պարագաներե ստիպյալ հարկադրվեր է եղեր։
⁂
Բարի էրթաք, Մարտիրոս աղա, ճանըմ աս ինչ կը լսենք կոր, կիներնիդ թողեր ուրիշ կնիկ առեր եք, ասչափ տարվան կնիկնիդ չի մեղքցաք նե՝ չորս զավակնի՞դ ալ չի մեղքցաք․
— Ձգե՛, աստվածդ կը սիրես, ծանր պարագաներե ստիպյալ հարկադրեցա ընելու։
⁂
Հոռոփ հանըմ, Մարիցա հանըմին էրիկը իր կնիկը ձգեր է և ուրիշ մը առեր է եղեր, լսեցիր․
— Ձգե՛, հոգիդ կը սիրես, մենք ալ լսեցինք, էրիկ օլաճախը կ՝ըսե եղեր քի, ծանր պարագաներե ստիպյալ հարկադրվեր է եղեր։
— Վա՜յ մեղքիս, զահեր աս այ նոր էլավ, Մարտիրոս աղան ալ, որ չորս զավակով կնիկը ձգեր նոր մը առեր էր, ան ալ թըփխը անանկ կ՝ըսե կոր եղեր։
— Քա, սա խոսքս ալ վուրկեց էլավ․ հանողին ճիտը տակը մնա, զահեր ասկե ետքը էրիկները կնիկներնին պիտի ձգեն ու հարցունողին «Ծանր պարագաներն ստիպյալ հարկադրեցանք» պիտի ըսեն:
⁂
Հասարակաց բարոյականի դեմ գրածներուդ կը հավնի՞ս կոր․
— Դուն քիթիդ վրա պենկ ունիս․
Կրկնամուսնություն պաշտպանելդ միթե հասարակաց բարոյականի դեմ չէ՞․
— Դուն պատռած բանթոլոն կը հագնիս․
Ընտանեկան պատիվներ շահու նյութ ընելը միթե բարոյականի դեմ չէ՞.
— Քու պոթինդ հին է․
Ընտանեկան պատվո դեմ չի գրելու համար ստակ պահանջելը միթե լեֆթերություն չէ՞․
— Դուն պանիր հաց կ՛ուտես։