սրամիտ ըլլալուս երկու տարվան մեջ սորվելիքս մեկ օրվան մեջ սորվեցա, գնաց։
— Ապրի՛ս տղաս։
⁂
— Մեղու, սա լրագիրները ինչո՞ւ չենկելեն կախեր ես պատեն ի վար։
— Կախվելու արժանի են, անոր համար կախեր եմ։
— Մասիսը գլխե՞ն կախեր ես։
— Այո՛։
— Մանզումեն ինչո՞ւ լեզվեն կախեր ես։
— Որովհետև իր անդամոց մեջ ամենեն ավելի պատժո արժանին լեզուն է։
— Հապա Ասիա՞ն:
— Ան ալ քիթեն կախված է։
⁂
Ուրախությամբ սրտի կը ծանուցանեմք, որ ազգայիններեն ոմանք Ուսումնական ընկերություն մը պիտի կազմեն եղեր Ասիայի թարգմանությունները կարդալով բան մը հասկնալու համար։
Կը գովենք այս ձեռնարկությունը, և կը խնդրենք ընկերութենեն, որ եթե ինք բան մը հասկնա մեզ ալ հասկցնելու բարեհաճի։
⁂
— Ինչո՞ւ համար գլուխնիս պոթին չենք հագնիր և միշտ ֆես կը հագնինք։
— Որովհետև գլուխովնիս չենք կրնար քալել։
— Բայց Սելամիեի հրաժարյալ թաղակա՞նն ալ չկրնար հագնիլ իր համարակալովը մեկտեղ։
— Անոնք արդեն հագած են, որովհետև քանի մը ժամանակե ի վեր գլխիվայր կերթան կոր։
⁂
— Ան չէ ամա, պարոն Խանճյան, դուն Սելամիեի դպրոցին տնօրե՞նն էիր, չէ նե՝ Թաղական խորհրդո համարակալն էիր։