ՖԱՐ ՏՅՈԻ ՊՈՍՖՈՐԻ ԳՐԱՍԵՆՅԱԿԻՆ ՄԵՋ
— Պարոն խմբագիր, ասկեց շաբաթ մը առաջ գրած էիք, թե՝0 վսեմափայլ Աբրահամ պեյ Երամյան Եգիպտոսեն մայրաքաղաքս հասավ։
— Այո՛, հասեր էր յա։
— Երեկվան թերթերնուդ մեջ դարձյալ կարդացի, որ վսեմափայլ Աբրահամ պեյ Երամյան Եգիպտոսեն մայրաքաղաքս հասեր է։
— է՛յ, սո՞ւտ է մի։
— Անցյալ շաբթվան շոգենավով եկողը ո՞վ էր։
— Վսեմափայլ Աբրահամ պեյն էր։
— է՛յ, հապա աս շաբթվան շոգենավով եկո՞ղը։
— Դարձյալ վսեմափայլ Աբրահամ պեյն էր։
— Առաջինը սխալ չըլլա՞։
— Չէ, ճանըմ, եկած էր ան օրը։
— Ինչպես կըլլա, որ շաբաթ մը առաջ Պոլիս եկողը երեկ դարձյալ կուգա։
— Գացած կըլլա տե՝ նորեն եկած կըլլա։
— Հրամանքնիդ այդ ներքին լուրերը ուսկի՞ց կառնեք կոր։
— Մենք լուրերնիս ուրիշեն չենք առներ, մենք կը շինենք կը գրենք։
— Անոր համար էր, որ առջի օրն ալ հայոց Պատրիարք մը դրած էիք։
— է՛յ, շիտակը հայոց ալ Պատրիարք մը պետք է։
— Ինչպե՞ս է գոնե դրած Պատրիարքնիդ։
— Աղեկ է, կըսեն կոր, անցյալ շաբթու Ընդհանուր ժողով գումարեր և բավական խելացի խոսքեր ըրեր է։
— Այդ Պատրիարքին անունը ի՞նչ է։
— Իրավ. անուն մը դրած էր Լա Թյուրքին, բայց ես մոռցա։