Էջ:Hagop Baronian, Collected works, vol. 9 (Հակոբ Պարոնյան, Երկերի ժողովածու, հատոր 9-րդ).djvu/176

- Ի՞նչպես պիտի երթա, չծախվիր կոր:

- Ինչո՞ւ կեցեր ես, սա Փունջերդ վիճակահանության չդնե՞ս։

- Նայինք, կը խորհիմ կոր։

Պարահանդեսի մը մեջ.

- Բարեկամ, անտանելի մեկը կա, որ քովես չբաժնվիր կոր և զբոսանքիս արգելք կ’ըլլա կոր։

- Չծախե՞ս։

- Խելացի է, չծախվիր կոր։

- Չծախվիր կո՞ր։

- Ո՛չ։

- Վիճակահանության դիր։

Երեկույթի մը մեջ.

- Ի՞նչպես ես, բարեկամ, օրիորդ Լուսիային հետ սիրահարության սկսա՞ր։

- Չէ։

- Ինչո՞ւ։

- Քանի մը անգամ բարև տվի, չարռներ կոր։

- Չա՞ռներ կոր։

- Ոչ,

- Բարևդ վիճակահանության դիր։

Վերջապես, ինչպես որ ըսինք, ամեն կողմ վիճակահանություն մ’է կերթա. եթե այսպես շարունակվելու ըլլա՝ քիչ ժամանակեն բոլոր խանութները պիտի գոցվին և վաճառականներն ապրանքնին վիճակահանությամբ պիտի ծախեն։

Աստված հաջողություն տա։

ԴՐԱՄԱԿԱՆ

<2>

Ընթերցողներեն ոմանք կը գանգատին, թե ինչու համար լրագրույս մեջ դրամական հոդվածներ չեն հրատարակվիր շարունակ:

Կը պատասխանենք։

Որովհետև, հրապարակի վրա շարունակ դրամ չգտնվիր կոր:

Վերցուր պատճառը, կը վերնա արդյունքը։

Վերցուր դրամը, կը վերնա դրամականը։

Հիմակու հիմա դրամ չկա, թուղթ կա։

Թուղթերու վրայոք խոսինք ուրեմն։

Ամենեն բարակ թուղթերը թրամվեյի թուղթերն են. թոփը ղուրուշի կ’առնվի։