Արդյոք անհրաժե՞շտ եք համարում այդտեղ թերթ հրատարակելը, արդյոք փողն իզուր դեն ածած չե՞ք լինիլ...
Ընդունեցեք բարևներս և, հարգանքներս։
Ինձ որ նամակ գրելու լինիք, գրեցեք ուղղակի իմ հասցեին՝
«Тифлис, Авлабар, около Покровских казарм, Моисеевский пер. № 3, Михаилу Оганезову:
77. ՀՈՎՀԱՆՆԵՍ ՄԱԼԽԱՍՅԱՆԻՆ
Սիրելի Հովհաննես.
Շնորհավորում եմ. «XX դարդ», բայց № 1-ի համար ոչինչ չեմ խոստանում, որովհետև ես զակազով առհասարակ ոչինչ չեմ կարողանում գրել. զակազով մի բան գրեցի Տ. Նազարյանի «Գեղափնջիկի» համար և ոչինչ բան դուրս եկավ: Ուզում ես կտամ իմ «Մանեն» բանասիրականում շարունակաբար տպագրելու համար (ոչ № 1-ից, իհարկե), բայց առանց փողի չեմ տալ։ Եթե համաձայն ես, գրիր, որ վեպս մի նոր բովից անցկացնեմ:
«Ժողովուրդը», կարծեմ, լոկ անուն էլ կմնա, լսեցի, որ աշունքից են ուզում հրատարակել, բայց խելքս բան չի կտրում։
Փող որ ունենայի, մի անգամ էլ կանցնեի քո կողմը. անտեր ճանապարհը շատ թանկ է նստում։
