Էջ:Nar-Dos, Collected works, vol. 4 (Նար-Դոս, Երկերի ժողովածու, հատոր 4-րդ).djvu/29

Վիքիդարանից՝ ազատ գրադարանից
Այս էջը հաստատված է

Որ մենք կապվեինք սուրբ ամուսնական
Անքակտ կապերով ամբողջ մարդկության
Եվ աստուծո առաջ.—

Ապա խոսք տուր ինձ, որ մահու մինչև
Քո գերեզմանը կըմնաս այդ կապին
Դու հավատարիմ և ոչինչ չար դև
Իրեն նենգավոր թույնով բնավին
Չի կարող սողալ ներսը քո սրտին
Եվ ո՛չ մի վայրկյան։

Խոսք տուր ինձ, որ դու, որպես կենակից
Կըբաժնես ինձ հետ ամեն, ամեն բան,—
Եվ իմ արցունքս թափած խոր վշտից,
Եվ իմ արցունքս քաղցր ուրախական.
Խոսք տուր, որ կյանքի բաժակ դառնության
Կըխմես ինձ հետ։

Բայց, ո՛վ կույս, եթե դու ինձ խաբում ես,
Եթե խոսքերդ կեղծ են, նենգավոր,
Եվ ինձ ընտրելով դու կամենում ես
Հագեցնել կիրքդ ժամանակավոր,—
Ապա հեռացի՛ր, Եվա նենգավոր,
Աղաչում եմ քեզ։

25 մարտի 1886.


ՎԵՆԵՐԱՅԻ ԵՐԳԸ

Դու, որ երկիրը ողջ դղրդեցնող
Որոտ ու շանթից բնավ չես վախենում.
Դու, որ ծովի վրա կատաղի մնչող
Խիստ ալիքներին ես սանձահարում,
Եվ բարձր օդում սաստիկ մրրիկին
Ճարպիկ խելքովդ ես կառավարում.
Դու, որ ամեհի առյուծ-գազանին