Էջ:Taghs - Ghevond Alishan (Ղևոնդ Ալիշան - Տաղեր).djvu/102

Վիքիդարանից՝ ազատ գրադարանից
Այս էջը սրբագրված է

Ի ԾՈՎԱԿԷ ԲԵՆԱԿԱՅ[1]


ԱՌ ԾՈՎԱԿՆ ԳԵՂԱՄԱՅ


Ա՜յ իմ խաժակըն խաժալանջ խաժահեր
Կապոյտ յատակ, կապոյտ գըմբէթ լուսայեռ.
Ծով հայրենեաց, ծով Գեղամայ գեղեցիկ,
Զորով փարի սիրտ, աչքս՝ աւա՜ղ, կան տարաձիգ.
Ըզցանկալի հայկապատշաճ քոյդ դիմակ
Ի հոմանւոջդ՝ այլ ի պանդուխտս ի Բենակ
Նըժդեհաբար սաղապաճեմ ի նախանձ
Յառեալ դիտեմ, եւ բարբառիմ ի քոյդ խանձ.
Յալեաց յալիս հովոյ ի հով ծուփ ի ծուփ
Միտքըս մրըրկեալ ընդ մըկանանց շարժ եւ շուփ,
Վարեալ առ քեզ յիշատակօք հայրենի,
Ի սմա սահել՝ ի քեզ լիւղալ իղձ լինի։
Ո՜վ կապուտակ, ծիծաղ ծաւալ խիտ առ խիտ,
Ե՞րբ վայրայած հանգիցէ գլուխ որդեկիդ
Ի պաղպաջուն ճերմականալ քոյին բարձ.
Անտուստ ըսթափ ի տիրագոյնն առնել դարձ,
Ըզգեղաճօճ դիտել ըստուերս Գեղամայ
Յարքունազարդ դարեւանդիցըն Գեղայ,
Եւ զվարդասփիւռ արշալըրշոց Ծիսական՝
Անդիմակայ դաշտիդ հրոսակ սիրական.
Լըսել ըզխիստ ժայռիցն հեզիկ ծնընդոց վաղ
Զկայտառ առուացն ի քեզ հոսանս գեղանազ.
Ըղձիւնաբարձ և ըզհրակիր դիտել սարս՝
Քեւ բուծեալս, քեւ շիջեալս, եւ զկողսըն դալարս.

  1. Լիճն Կարտայ ի մեջ Լոմպարտիոյ եւ Վենետկոյ։