Էջ:Yeghishe Charents, Collected works, vol. 4 (Եղիշե Չարենց, Երկերի ժողովածու, հատոր 4-րդ).djvu/173

Գիրքս նվիրում եմ իմ դուստր
ԱՐՓԵՆԻԿ ՉԱՐԵՆՑԻՆ

ԱԿՐՈՍՏԻՔՈՍ

Արեգա՛կ, օվկիան զորության,
Րոպե առ րոպե քո հրով
Փայփայի՛ր, տուր զորություն
Էակին այս երգի ու սիրո.
5 Նա դեռ փո՜քր է այնքան ու թույլ,
Իր սիրտը — դեռ սափոր է մաքուր,—
Կազդուրվի՛ թող նա քո հրով։

Չլինի՛ թող որ աշխարհում,
Արեգա՛կ, որ ես չերգեմ
10 Րախճական, ռամիկ այս դարում,
Էությամբ քո լցված, հրկեզ,
Նվիրված պայքարին այս ու քեզ
Ցարդ չեղած տաղեր ու երգեր։—

1933, V, 18