Ժողովուրդ (Ջիվանի)

Ժողովուրդ

Ժողովուրդը ահռելի ջրհեղեղ է,
Առաջը առնելը շատ դժվար բան է.
Թե գրգռվեց, կատաղի է, ահեղ է,
Քարափներ կըքանդե, ամեն ինչ կանե։

Սև ածուխ կըդառնաս, մեծամի՛տ հսկա,
Թե խելք ունիս, կրակի հետ մի խաղա,
Թե նրա փեթակին հպի, վնաս տա,
Մեղուն խմբով մեծ վիշապին կսպանե:

Արտաքուստ կարծվում է խմորի գնդակ,
Բայց մեջը պահված կա զորեղ ուժանակ,
Ժողովրդի հետը չի լինի կատակ,
Թե միացավ, սարը տեղից կհանե:

Շատ ուժեղ է ժողովրդի ապտակը,
Ում որ դիպավ կըջախջախի կզակը,
Մի օր պիտի առնե ոտքերի տակը,
Ով որ նրան հող ու մոխիր կանվանե:

1905

---