Jump to content

Իրավունք (Ջիվանի)

Վիքիդարանից՝ ազատ գրադարանից
Իրավունք
Պիտի գա՞ արդյոք

Իրավունք


Թող ես մշակ լինիմ, դու եղիր իշխան —
Պատվիս ու կրոնիս, հացիս մի դիպչի,
Թե կուզես հաշտ ապրինք, բարի հարևան,
Պատվիս ու կրոնիս, հացիս մի դիպչի։

Անհատական իրավունքս է ամեն ժամ,
Իմ պարտքն է աշխատեմ, ոչ ոքի չտամ.
Թե կուզես իրար հետ մնանք բարեկամ,
Պատվիս ու կրոնիս, հացիս մի դիպչի:

Անպատիվ մարդու մոտ չի լինի հավատ,
Պատիվ չեղած տեղը հաց չկա առատ,
Կը ցանկաս, որ չանեմ քեզանից գանգատ,
Պատվիս ու կրոնիս, հացիս մի դիպչի։

Բնավ չեմ նախանձի քո ճոխ սեղանին,
Քու ոսկուն, արծաթին և գանձարանին.
Այս երեքով կապրի աշըղ Ջիվանին,
Պատվիս ու կրոնիս, հացիս մի դիպչի։

1898