Խեղճ մարդը (Ջիվանի)
Արտաքին տեսք
Խեղճ մարդը
Եռանդը կսառի, սիրտը կըկոտրի,
Հոգսերով ճնշված աղքատ, խեղճ մարդուն,
Խոսքը անց չի կենալ, հոգին կըտրտմի,
Ուժը կընվազի հաստատ խեղճ մարդուն։
Աշխույժը հարուստի նման չի վառիլ,
Չի կարող նեղության դեմը մաքառիլ.
Սերը ամեն բանից կսկսե սառիլ,
Էլ չի մնալ հույս ու հավատ խեղճ մարդուն։
Մարդիկը կարծես թե չեն տեսնում նրան,
Կամ թե դիտմամբ տվել են մոռացության,
Ոչ նյութական ուժ կա, ոչ բարոյական,
Դուք կտեսնեք միշտ հուսահատ խեղճ մարդուն։
Ջիվան, խեղճի համար ի՞նչ խաղ ու խնդում,
Թեկուզ լինի բարեկենդան, կամ խթում.
Ճակատը ամպամած, երեսը տրտում.
Սիրտն է ավեր և անապատ խեղճ մարդուն։