ՀՍՀ/ԱԳՌԱՎ

ԱԳՌԱՎ (Corvus corone), ճնճղուկազգիների կարգի ագռավների ընտանիքի թռչուն։ Մարմնի երկ․ 45–50 սմ։ Կտուցը և ոտքերը ամուր են, թևերը՝ լայն ու կարճ, պոչը՝ ուղիղ, կլորավուն։ Հայտնի է 9 տեսակ, 6՝ մոխրագույն, 3՝ սև փետուրներով։ Տարածված է Եվրոպայում, Կենտր․ և Հարավ֊Արևել․ Ասիայում, Աֆրիկայում, Հյուսիս․ Ամերիկայում։ Հյուսիսում ապրողները չվող են, հարավում ապրողները՝ նստակյաց։ Ա․ մոնոգամ է, բույնը դնում է ծառերի, թփերի, ժայռերի վրա։ Բազմանում է տարին մեկ կամ երկու անգամ՝ դնելով 3–8 խայտաբղետ ձու։ Ամենակեր է, երբեմն՝ վնասատու։ Սնվում է պտուղներով և այլ թռչունների ձվերով ու ձագերով։ ՀՍՍՀ֊ում տարածված է Ա֊ի 8 տեսակ։