ՀՍՀ/ԱԶՆԱՎՈՒՐՅԱՆ ԱՐՈՒՍ

ԱԶՆԱՎՈՒՐՅԱՆ Արուս Միսակի (ծն.1904), հայ սովետ․ դերասանուհի։ ՀՍՍՀ ժող. արտիստուհի (1967)։ Ծնվել է հունվ. 16 (29)֊ին, Թիֆլիսում։ Բեմ է բարձրացել 1920-ին, Թիֆլիսի Զուբալովի ժող. տան դրամատիկական խմբում։ 1920–30-ական թթ. խաղացել է Հ. Աբելյանի, Հ. Ոսկանյանի շրջագայող խմբերում։ Փառանձեմ բեմական անունով մասնակցել է նաև երաժշտական կոմեդիաների ներկայացումներին։ Ա. կատարել է կատակերգական, բնութագրային և դրամատիկ դերեր, որոնք աչքի են ընկել իրենց անմիջականությամբ ու անկեղծությամբ: 1930-ից աշխատում է Լենինականի Ա. Մռավյանի անվ. թատրոնում։ Լավագույն դերերից են՝ Շպպանիկ, Ջավահիր (Շիրվանզադեի «Նամուս», «Չար ոգի»), Սողոմե, Մարթա (Պարոնյանի «Պաղտասար աղբար», «Ատամնաբույժն արևելյան»), Էփեմիա (Սունդուկյանի «Պեպո»)։