ՀՍՀ/ԱԼԱՄԵՔ

ԱԼԱՄԵՔ, Ալամենց, հայաբնակ գյուղ Արևմտյան Հայաստանում, Բիթլիսի վիլայեթի Դատվանի գավառակում, Բիթլիս գետի հովտում։ Բնակիչների հիմնական զբաղմունքն էր այգեգործությունն ու երկրագործությունը։ Ա–ի մոտ են գտնվում «Ալամենց խան» հայտնի իջևանատան ավերակները։ Իջևանատունը, որ քարակերտ և կամարակապ եռահարկ շենք էր օժանդակ սենյակներով և գավթով, գոյություն է ունեցել արաբական տիրապետության ժամանակներից (VII–IX դդ.)։ Ա. ավերվել է 1915-ին։