ՀՍՀ/ԱԼՅՈՒՄԻՆԻ ՀԱՄԱՁՈՒԼՎԱԾՔՆԵՐ

ԱԼՅՈՒՄԻՆԻ ՀԱՄԱՁՈՒԼՎԱԾՔՆԵՐ, համաձուլվածքներ, որոնց հիմքը ալյումինն է։ Փոքր խտության հետ մեկտեղ ունեն բարձր էլեկտրահաղորդականություն և ջերմահաղորդականություն, կոռոզիակայունություն, բարձր տեսակարար ամրություն։ Կիրառվում են ավիացիայում, տրանսպորտում, շինարարությունում, շարժական ագրեգատներում, փոխադրովի հարմարանքներում՝ մեքենաների և կոնստրուկցիաների կշռի թեթևացման նպատակով, ինչպես նաև ամանեղենի պատրաստման համար։ Ա. հ. բաժանվում են 2 խմբի՝ ձուլման և դեֆորմացվող։ Ձուլման Ա. հ. պարունակում են ${\ce {Si, \; Cu, \; Mg, \; Zn}}$ ևն, ունեն ձուլման լավ հատկություններ, բայց Փոքր պլաստիկություն, ամրանում են մոդիֆիկացմամբ (տես Մոդիֆիկացում մետաղների) և ջերմամշակմամբ, կիրառվում են ձևավոր ձուլման համար (տես Ձուլման արտադրություն)։ Դեֆորմացվող Ա. հ. պարունակում են ${\ce {Cu, \; Mg, \; Mn, \; Ni}}$ ևն, ավելի ամուր են ու պլաստիկ, ամրանում են ջերմամշակմամբ։ Օգտագործվում են դեֆորմացիայի միջոցով կռվածքներ, դրոշմվածքներ, գլանվածքներ ստանալու համար։ Կրակաամուր Ա. հ. (ձուլման և դեֆորմացվող) կարող են աշխատել բարձր (200°C–ից 300°C) ջերմաստիճաններում (մխոցներ, ինքնաթիռների երեսվածքներ, հրթիռների պատյաններ ևն)։ Ա. հ–ի թերթերի երեսապատումը (մետաղապատումը) մաքուր ալյումինի բարակ շերտով բարձրացնում է նրանց կոռոզիակայունությունը։