ՀՍՀ/ԱԿԱՆՋՄՏՈՒԿՆԵՐ

ԱԿԱՆՋՄՏՈՒԿՆԵՐ, մաշկաթևեր (Dermaptera), միջատների կարգ։ Կերպարանափոխվում են ոչ լրիվ։ Մարմինը տափակ է, երկարությունը՝ 3,5–50 մմ փորը՝ աքցանաձև հավելումով։ Ունեն կարճ մաշկային վերնաթևեր, որոնց տակ երբեմն գտնվում են թաղանթաթևեր։ Բազմանում են տարեկան 1 անգամ՝ դնելով մինչև 80 ձու։ Վարում են գիշերային կյանք։ Խոնավասեր են, ամենակեր։ Տարածված են տաք երկրներում։ Հայտնի է Ա–ի մոտ 1000 տեսակ (ՀՍՍՀ–ում 4-ը՝ առափնյա, բանջարանոցային, սովորական և երկբծանի)։ Որոշ տեսակներ վնասում են գյուղատնտեսական բույսերը։