ՀՍՀ/ԱԿՏԻՎԱՑՐԱԾ ԿԱՎԵՐ

ԱԿՏԻՎԱՑՐԱԾ ԿԱՎԵՐ, վերամշակված բնական կավեր, որոնք ունեն ընտրողական ադսորբող հատկություն։ Պարունակում են ակտիվ կենտրոններ, որոնք երբեմն կլանվող նյութերի հետ փոխազդում են քիմիապես (տես Քեմասորբում)։ Ա. կ. ստացվում են ֆլորիդինային և բենթոնիտային կավերից, որոնցից առաջինները բնական վիճակում արդեն ակտիվ են և ենթարկվում են միայն ջերմամշակման (150–400° C), իսկ բենթոնիտները նախ մշակում են թթուներով։ Ա. կ. օգտագործվում են հիմնականում նավթի և սննդի արդ–յան մեջ` քսայուղերի, ձեթերի, գինու, գարեջրի և այլ նյութերի մաքրման համար։ Մ. Սարգսյան